Mavjud texnika parkini yangilash va ko‘mir qazib olish hajmlarini oshirish maqsadida “O‘zbekko‘mir” aksiyadorlik jamiyatiga zamonaviy  kon-texnikalari keltirilmoqda.  Ushbu texnika vositalarini yig‘ish ishlari jamiyatning “Avtomobil texnologik transporti” filialida amalga oshirilyapti.
 
Filial bosh muhandisi Rustam Qandaharov bergan ma’lumotlarga ko‘ra, bugungi kungacha “Komatsu” rusumli to‘qqizta avtosamosval keltirildi. Yuk ko‘tarish qobiliyati 90 tonna bo‘lgan ushbu texnikaning hozirda oltitasi yig‘ilib, foydalanishga tayyorlab qo‘yildi. 

Har bir texnikani yig‘ish ishlarida Farrux Abbosov boshchilik qilayotgan 1-avtosaroyning ta’mirlash ustaxonasi mutaxassislari – naladchik Azizbek Yuldashev,  elektr chilangari Shohruh Omonov, avtochilangarlar Bobur Kamoliddinov va Baxtiyor Ishmatov, mexanik Sarvar Aktamov hamda “Temir yo‘l transporti” filiali temir yo‘l krani mashinisti Alisher Shokirov  va uning yordamchisi Rustam Qo‘ziyevlar ishtirok etmoqdalar.

Jarayon yangi texnikani yetkazib beruvchi kampaniya vakillarining bevosita ishtirokida kechmoqda.

Qutlug‘ Teshaboyev