“O‘zbekko‘mir” aksiyadorlik jamiyati tizimidagi filiallarda 2026–2028-yillarga mo‘ljallangan Jamoa shartnomasining mazmun-mohiyatini mehnat jamoalariga yetkazishga qaratilgan uchrashuvlar o‘tkazilmoqda.

Navbatdagi tadbir Jamiyatning “Standartlash, sertifikatlash va sifat nazorati”  filialida tashkil etilib, unda kasaba uyushmasi va ma’muriyat vakillari hamda filialning 63 nafar xodimi ishtirok etdi.

Uchrashuv davomida Jamoa shartnomasining asosiy qoidalari, unda nazarda tutilgan mehnatga oid, ijtimoiy-iqtisodiy va kasbga oid munosabatlarni tartibga soluvchi normalar, shuningdek, xodimlar uchun belgilangan yangi ijtimoiy kafolatlar, mehnatni muhofaza qilish, ish haqi hamda qo‘shimcha imtiyozlar haqida batafsil ma’lumot berildi.

Uchrashuv yakunida xodimlar o‘zlarini qiziqtirgan savollarga javob oldilar hamda shartnomaning ayrim bandlari yuzasidan fikr va takliflarini bildirdilar. Bunday tushuntirish tadbirlari Jamiyatning boshqa tarkibiy korxonalarida ham izchil davom etmoqda.

Ma’lumot uchun, Jamoa shartnomasi “O‘zbekko‘mir” aksiyadorlik jamiyatida ish beruvchi bilan xodimlar o‘rtasidagi mehnatga oid, ijtimoiy-iqtisodiy va kasbga oid munosabatlarni tartibga soluvchi asosiy normativ hujjat hisoblanadi.