“Ko‘mir ta’minot” MChJ kasaba uyushma qo‘mitasining hisobot konferensiyasi bo‘lib o‘tdi.

“O‘zbekko‘mir” AJ ma’muriy binosida tashkil etilgan tadbirda “Ko‘mir ta’minot” MChJ ijro apparati va hududiy filiallaridan delegatlar ishtirok etdi.

Konferensiyada “Ko‘mir ta’minot” MChJ kasaba uyushma qo‘mitasi raisi Muhiddin Mamatisaevning hisoboti tinglandi.

Bugungi kunda jamiyat tizimida 1ming 140 nafarga yaqin kishi mehnat qilmoqda. Ish beruvchi tomonidan ularning Jamoa shartnomasida belgilab qo‘yilgan huquq va manfaatlarini ta’minlash, unumli mehnat qilish va mazmunli hordiq chiqarish, salomataligini tiklash, ijtimoiy himoya qilish borasida muayyan ishlar amalga oshirilmoqda. Ayni paytda xodimlarni har tomonlama qo‘llab-quvvatlash yo‘nalishida hali ko‘p ishlar qilinishi kerakligi ta’kidlandi.

Delegatlar Kasaba uyushma qo‘mitasining o‘tgan hisobot davridagi faoliyatini qoniqarli deb topdilar.

Tashkiliy masala ko‘rildi. Muhiddin Mamatisaev “Ko‘mir ta’minot” MChJ kasaba uyushma qo‘mitasi raisi etib qayta saylandi.

Shuningdek, kasaba uyushma qo‘mitasining uch kishidan iborat Kengashi tarkibi tasdiqlandi.

Shu yilning aprel oyida “O‘zbekko‘mir” AJ Birlashgan kasaba uyushma qo‘mitasi konferensiyasi o‘tkaziladi. Tadbirda kun tartibiga kiritilgan ushbu konferensiyaga delegatlar saylash masalasi ham atroflicha ko‘rib chiqildi va tegishli qaror qabul qilindi.

Konferensiyada “O‘zbekko‘mir” AJ Birlashgan kasaba uyushma qo‘mitasi raisi A.Qayumov so‘zga chiqdi.