Prezident Shavkat Mirziyoyev Toshkent viloyatining O‘rta Chirchiq tumanida Toshkent – Samarqand yo‘nalishidagi yangi avtomobil yo‘li qurilishiga tamal toshi qo‘yish marosimida ishtirok etdi.

Bu haqida Prezident matbuot kotibi xabar berdi.

Davlatimiz rahbari mazkur loyiha mamlakat transport infratuzilmasini rivojlantirishdagi muhim tarixiy qadam ekanini ta’kidladi. Qiymati qariyb 2,2 milliard dollar bo‘lgan zamonaviy olti polosali avtomagistralning uzunligi 282 kilometrni tashkil etadi. Loyiha doirasida 92 ta ko‘prik, 28 ta yo‘l o‘tkazgich va 60 ta tunnel tipidagi o‘tish joyi barpo etiladi.

Yangi magistral foydalanishga topshirilgach, Toshkentdan Samarqandga yetib borish vaqti 5 soatdan 2,5 soatga qisqaradi. Yo‘l sutkasiga 60–80 mingta transport vositasini qabul qilish quvvatiga ega bo‘lib, yuk tashish tannarxini 20–24 foizga kamaytirishi kutilmoqda.

Qayd etilganidek, loyiha xalqaro tranzit salohiyatini oshirish, logistika markazlari va yangi ishlab chiqarish quvvatlarini yaratish, minglab ish o‘rinlarini tashkil etish hamda hududlar iqtisodiy faolligini sezilarli darajada yuksaltirishga xizmat qiladi.

Marosim yakunida Prezidentimiz ramziy kapsula qo‘yib, yangi avtomagistral qurilishiga rasman start berdi.
 

Manbaa: https://t.me/Press_Secretary_Uz/7647