Bugun Toshkent shahridagi Hyatt Regency  mehmonxonasida oʻtkazilgan Xalqaro yoqilgʻi energetika sammitida “Oʻzbekkoʻmir” AJ vakillari ishtirok etdi.

Respublikamizning yirik yoqilgʻi kampaniyalari mutaxassislari qatnashgan anjumanda  neft va gaz tarmogʻida energetika xavfsizligini taʼminlash, Oʻzbekistonda yashil iqtisodga oʻtish, korxonalarda sanoat xavfsizligi yuzasidan maʼruzalar tinglandi.
  
Oʻzbekiston Respublikasi yoqilgʻi-energetika balansida koʻmirning ulushi ortib bormoqda. Koʻmir sanoatini yanada rivojlantirish, xususan, “Oʻzbekkoʻmir” aksiyadorlik jamiyatida ekologik xavfsiz ishlab chiqarishni yoʻlga qoʻyish muhim ahamiyatga ega. Bu borada muhokamalarda xalqaro hamkorlik  yuzasidan tashqi iqtisodiy aloqalar, investitsiya, innovatsiya va xususiy davlat sherikchiligini rivojlantirish departamenti boshligʻi Jasurbek Karimov va investitsiya loyihalarini ishlab chiqish va ekspertizadan oʻtkazish boʻlimi boshligʻi Qutlugʻ Teshabayev  qatnashdilar.

Sammitda Markaziy Osiyo va Qozogʻiston va Rossiya Federatsiyasining yoqilgʻi-energetika sohasi ilgʻor va yuqori tajribaga ega boʻlgan kampaniyalardan tashrif buyurgan mutaxassislar  bilan muloqot oʻtkazildi. Kelgusi ishlab chiqarish jarayonida yuzaga keladigan muammolarni bartaraf etish, Respublikamizda ishlab chiqarilmaydigan uskuna va ehtiyot qismlar taʼminoti boʻyicha toʻgʻridan-toʻgʻri ishlab chiqaruvchilar bilan shartnomalar asosida hamkorlik qilish yuzasidan kelishib olindi.

Sammit davomida J.Karimov “Oʻzbekkoʻmir” AJ faoliyatiga tegishli boʻlgan muammoli savollarga atroflicha javob berib, ishtirokchilarni mamnun etdi.
Yakunda faol ishtiroki uchun J.Karimovga Sammit tashkilotchilarining maxsus sertifikati topshirildi.

Qutlugʻ Teshaboyev, 
Investitsiya loyihalarini ishlab chiqish va ekspertizadan oʻtkazish boʻlimi boshligʻi