“O'zbekko‘mir” AJ tizimida butun umrini mehnatga bag‘ishlab, Vatan taraqqiyotiga munosib hissa qo‘shib, jamoa hurmatiga sazovor bo‘lgan ustoz konchilar ko‘p. 13-mart kuni ana shunday fidoyi konchilar – “Tog‘-kon uskunalarini sozlash zavodi” filiali rahbari Marajab Tursunov hamda “Geologiya-qidiruv ekspeditsiyasi” filiali rahbari To‘lqin Abdujalilovlarni nafaqaga kuzatish marosimi bo‘lib o‘tdi.

Marajab Tursunov 1957-yilda Angren shahrida tug‘ilgan. U mehnat faoliyatini yoshlikdan boshlab, ko‘mir sanoatida uzoq yillar samarali ishladi. Mehnatsevarligi, mas’uliyati va tashabbuskorligi tufayli turli lavozimlarda faoliyat yuritib, keyinchalik “Tog‘-kon uskunalarini sozlash zavodi” filialiga rahbarlik qildi. Uning rahbarligida korxonada ishlab chiqarish samaradorligini oshirish, mahalliylashtirish dasturlarini amalga oshirish va yangi ishlab chiqarish yo‘nalishlarini yo‘lga qo‘yish borasida muhim ishlar amalga oshirildi.

To‘lqinjon Abdujalilov esa ko‘p yillar davomida geologiya va qidiruv ishlarida faol ishtirok etib, ko‘mir sanoati rivojiga munosib hissa qo‘shdi. U o‘z mehnat faoliyati davomida turli lavozimlarda ishlab, boy tajriba orttirdi va keyinchalik “Geologiya-qidiruv ekspeditsiyasi” filiali rahbari sifatida samarali faoliyat olib bordi. Uning rahbarligida amalga oshirilgan geologik qidiruv ishlari tarmoq rivojida muhim ahamiyat kasb etdi.

Jamiyat ijro apparati faollar zalida tashkil etilgan va Birlashgan kasaba uyushma qo‘mitasi raisi hamda bosh muhandis V.Kuznetsov ochib bergan tadbirda so‘zga chiqqanlar ustoz konchilarning mehnatsevarligi, jamoaga sadoqati va yosh mutaxassislarga ustozlik qilganini alohida ta’kidladilar. Ularga sog‘lik-salomatlik, uzoq umr va oilasi davrasida baxtli hayot tiladilar.

Tadbir yakunida ustoz konchilarga chuqur hurmat va ehtirom ramzi sifatida yelkalariga milliy zarbof to‘n kiydirildi, esdalik sovg‘alari hamda gullar taqdim etildi.

“O'zbekko‘mir” AJ Axborot xizmati