Har bir katta yo‘l ustozdan boshlanadi. Kasbning sir-asrorini o‘rganish, uning mashaqqati va mas’uliyatini anglash, eng muhimi, orttirilgan tajribani keyingi avlodga yetkazish — avlodlar davomiyligini ta’minlaydigan ulug‘ an’anadir.

1 oktyabr — O‘qituvchi va murabbiylar kuni munosabati bilan ana shu ezgu an’anaga munosib hissa qo‘shib kelayotgan ko‘mir sanoati ustozlari va faxriylariga alohida ehtirom bildiramiz.

Bugun, 78 yillik taraqqiyot yo‘lini bosib o‘tgan soha zamonaviy texnika va texnologiyalar, yangi yondashuvlar bilan bir qatorda, ko‘p yillik boy kasbiy tajribaga ham tayanib rivojlanmoqda.

Bu yil ko‘mir sohasida bozor mexanizmlari joriy etilayotgani «O‘zbekko‘mir» AJ zimmasiga yangi va ulkan vazifalar yuklamoqda. Bunday sharoitda zamonaviy bilim va malakani hayotiy tajriba bilan uyg‘unlashtirish, yosh mutaxassislarni kasbga puxta tayyorlash yanada muhim ahamiyat kasb etadi.

Jamiyatimizning bugungi faoliyati ham bozor mexanizmlari asosida ishlashga moslashish jarayonini qamrab olmoqda.

Shu ma’noda, «ustoz-shogird» an’anasi — shunchaki kasb o‘rgatish emas, balki konchilik maktabining uzluksizligini ta’minlaydigan muhim qadriyatdir. O‘z kasbini yillar davomida puxta egallagan ustozlar yoshlarga nafaqat mehnat ko‘nikmalarini, balki mas’uliyat, intizom, xavfsizlik madaniyati va kasbga sadoqatni ham o‘rgatib kelmoqda.

Ayni paytda «O‘zbekko‘mir» AJ tizimida olti ming nafardan ziyod ishchi-xizmatchi mehnat qilmoqda. Ularning har biri ortida muayyan kasb maktabi, tajriba va ustozlar sabog‘i bor.

Qadrli ustozlar!

Sizlarni O‘qituvchi va murabbiylar kuni bilan samimiy muborakbod etaman.

Sizlarga mustahkam sog‘lik, uzoq umr, xonadonlaringizga fayzu baraka, mehnatingizga omad va shogirdlaringiz kamolidan bahramand bo‘lish baxtini tilayman.

Bayramingiz muborak bo‘lsin, aziz ustozlar!

Abdunosir Qayumov,

«O‘zbekko‘mir» AJ Birlashgan kasaba uyushma qo‘mitasi raisi