Янги Ўзбекистоннинг кўркам манзилларига саёҳат
Nashr qilingan sana: 13.09.2021 16:15:30Жорий йилнинг 31 август куни Тошкент вилоятининг Қибрай туманида “Янги Ўзбекистон” боғининг тантанали очилиш маросими бўлиб ўтган эди. Ўтган қисқа вақт ичида ушбу маскан юртдошларимиз ва ҳорижлик меҳмонларнинг энг яхши саёҳат масканига айланиб улгурди.
11 сентябрь куни “Ўзбеккўмир” АЖ ходимларидан бир гуруҳи ҳам пойтахтимизга саёҳатни айнан “Янги Ўзбекистон боғи”дан бошладилар.
Ушбу боғ харитасига қарасангиз, унинг шакли улкан дарахтнинг бешта шохига ўхшайди. Бир юз тўрт гектарлик ҳудуд марказида “Истиқлол” мажмуаси қад ростлаган. Бу ерда айни пайтда сунъий кўл, спорт майдончалари, болалар ўйингоҳлари, амфитеатр, фавворалар, савдо ва хизмат кўрсатиш объектлари, ҳунармандчилик дўконлари ташкил этилмоқда.
Боғ томошасига ошиққан саёҳатчиларни айниқса, “Истиқлол” мажмуаси ҳайратга солди. Ушбу мажмуанинг юқори нуқтасига Ҳумо қуши ҳайкали қўндирилган. Монументнинг асосий қисмига миллий давлатчилигимиз ва илм-фанимиз, адабиётимиз тарихида ўчмас из қолдирган аждоджларимиз, жадидлик ҳаракатининг фаол иштирокчилари, ХХ аср ва ХХI аср биринчи чорагида Ўзбекистонни бошқарган бир қатор раҳбарлар тимсолини ўзида акс эттирган ҳайкаллар ўрнатилган. Шунингдек, декорацияда тарих ва бугун нафасини акс эттиррувчи ёрдамчи деталлар тасвири ҳам мавжуд.
Истиқлол йиллари эришилган ютуқлар ўз аксини топган “Янги Ўзбекистон” боғидан кейинги манзиллар “Шаҳидлар хотираси” мажмуаси ва “Қатағон қурбонлари хотираси” музейи, Иккинчи жаҳон урушида фашизм устидан қозонилган ғалабанинг 75 йиллигига бағишлаб барпо этилган “Ғалаба боғи” ёдгорлик мажмуаси ва “Шон-шараф” давлат музейи бўлди.
“Ўзбеккўмир” АЖ ишчи-ходимлари “Ғалаба” боғи ҳудудида уруш ва унинг оқибатлари, уруш даври манзаралари, жумладан окоп ва блиндажлар, платкалар, дала ошхоналари, ўша даврдаги ҳарбий техника ва қурол-яроғлар, Ўзбекистон халқининг фронт ва фронт ортида кўрсатган жасорати, машаққатли меҳнати, қайғу-алами, шунингдек, эришилган буюк ғалабага қўшган улкан ҳиссаси ифодаланган ҳайкал ва декорациларни кўздан кечиришди.
Саёҳатчиларнинг аксари хотин-қизлардан иборат эканлиги учунми, “Матонат мадҳияси” мажмуасига алоҳида эътибор қаратилди. Унда бутун ўзбек аёлларининг садоқати рамзига айланган зангиоталик Зулфия Зокирова ва унинг урушда ҳалок бўлган беш ўғлининг вафодор рафиқалари акс эттирилган эди.
Замонавий ва қулай автобусда пойтахт бўйлаб давом этган саёҳатда танаффус тушлик вақтига тўғри келди. Саёҳатчилар миллий таомлари билан машҳур бўлган ресторанда овқатланиб, ором олгач кейинги манзиллар сари юриш бошланди.
“Жасорат” монументал мажмуаси 1966 йил 26 апрель куни соат 5:24да Тошкент шаҳрида юз берган 8,3 балли зилзила ва ундан кейинги шаҳарнинг қайта тикланиши тарихини ўзида акс эттиради. Саёҳатчилар ушбу масканда ҳам бўлдилар.
Шаҳри азимга саёҳат Ҳазрати Имом мажмуаси зиёрати билан ниҳоясига етди. Мажмуа таркибига кирувчи “Мўйи Муборак” мадрасасида Қуръони Каримнинг энг қадимий нусхаси – ҳазрати Усмон Мусҳафи сақланар экан. Йўлбошловчи берган маълумотга кўра, бу муборак Қуръон учинчи халифа Усмон ибн Аффон буйруғига асосан VII асрда (мил. 644–648 йй.) кийик терисига кўчиртирилган. Ўша даврда жами олти нусха Мусҳаф кўчиртирилган. Халқаро ЮНЕСКО ташкилоти 2000 йилнинг 28 августида ушбу Мусҳафнинг асл нусха эканини тасдиқловчи ҳужжат – сертификат берди.
Жамият Бирлашган касаба уюшма қўмитаси ташкиллаштирган саёҳат кўтаринки руҳда якунланди. Барча иштирокчиларнинг ундан мамнунлиги юз-кўзларидан, ўзаро суҳбатларидан билиниб турарди.
Азим Тошкент кундан-кунга ўзгариб, чирой очиб бормоқда. Ҳар сафар келган одам янги бунёдкорлик намуналаридан баҳраманд бўлиб кетади.
Отабек Бакиров
Izohlar
Oxirgi yangiliklar:
Fuqaro muhofazasi va yong‘in xavfsizligi – dolzarb vazifa
Bugun “O‘zbekko‘mir” aksiyadorlik jamiyatida “Favqulodda vaziyatlar sodir bo‘lganda ob’ekt tuzilmalarining shahar fuqaro muhofazasi xizmatlari bilan hamkorlikdagi harakat...
O'qishHududiy ko‘mir omborlarida xavfsizlik holati o‘rganilmoqda
Respublika hududiy ko‘mir omborlarida kuz-qish mavsumiga qanday tayyorgarlik ko‘rilmoqda? Ushbu ob’ektlarda texnika va yong‘in xavfsizligi choralari qay darajada ko‘rilga...
O'qish2025-yilda ko‘mir qazib chiqarish hajmi 10 million tonnaga yetkazilishi kutilmoqda
Geologiyadagi muhim yo‘nalish ko‘rib chiqildi 13.05.2024 Prezident Shavkat Mirziyoyev 13-may kuni ko‘mir qazib chiqarishni oshirish rejalari taqdimoti bi...
O'qishKonchilar spartakiadasi: g‘oliblar munosib taqdirlandi
«O‘zbekko‘mir» aksiyadorlik jamiyatida O‘zbekiston konchilik va metallurgiya sanoati xodimlari kuniga bag‘ishlab an’anaviy tarzda o‘tkaziladigan «Konchilar...
O'qish