Ijtimoiy tarmoqlarda Paxtaobod ko‘mir omborining temir yo‘l qismi go‘yo sun’iy ravishda yaroqsiz holatga keltirilib, faoliyati to‘xtatilgani hamda aholi uchun mo‘ljallangan ko‘mir mahsuloti hozirda qo‘shni Andijon tumani hududida tarqatilayotgani haqida xabar tarqaldi (https://t.me/komporuz/28035).

“O‘zbekko‘mir” AJ axborot xizmati mazkur holatni “Ko‘mir ta’minot” MChJ mas’ul xodimlari bilan birgalikda o‘rganib, quyidagilarni ma’lum qiladi:

Haqiqatda, hozirgi kunda Paxtaobod tumani uchun ajratilgan ko‘mir yoqilg‘isi Paxtaobod tuman hokimligi bilan kelishilgan holda vaqtincha “Andijon-2” temir yo‘l stansiyasi orqali aholiga yetkazib berilmoqda.

Bu chora Paxtaobod ko‘mir omboriga kiruvchi temir yo‘lning 7-sonli yuk ortib-tushirish yo‘lagi yaroqsiz holatga kelib qolgani sababli ko‘rilgan. 2025 yil 6 noyabr kuni “Andijon-2” temir yo‘l stansiyasi mas’ul xodimlari tomonidan o‘tkazilgan tekshiruv jarayonida yuk tushirish handag‘i (yamasi) o‘pirilgani, himoya ballastining beton qismi buzilgani, natijada vagonlarni ag‘darilib ketish xavfi mavjudligi aniqlangan.

Mazkur holat ishchi-xizmatchilarning hayoti uchun xavf tug‘dirishi hamda temir yo‘l infratuzilmasiga zarar yetkazishi mumkinligi sababli, xavfsizlikni ta’minlash maqsadida ko‘mir tarqatish jarayoni vaqtincha “Andijon-2” stansiyasiga ko‘chirildi.

Ayni paytda Paxtaobod tumani aholisiga ko‘mir mahsulotini yetkazish ishlari tasdiqlangan reja-jadval asosida, mahalla fuqarolar yig‘inilar kesimida navbat bilan amalga oshirilmoqda.

Paxtaobod tuman ko‘mir omboriga olib boruvchi temir yo‘l qismini tezkor ta’mirlashning barcha choralari ko‘rilmoqda va uning faoliyati to‘liq qayta tiklanadi.

“O‘zbekko‘mir” AJ Axborot xizmati