“Ўзбеккўмир” АЖ “Ангрен кўмир кони” филиалида Ўзбекистон Республикаси Конституцияси кунига бағишланган тантанали байрам тадбир бўлиб ўтди.

Тадбирни Бирлашган касаба уюшмаси қўмитаси раиси Абдуносир Қаюмов кириш сўзи билан очиб берди.
Таниқли сиёсий шарҳловчи Қуддус Аъзамов Ўзбекистон Республикаси Конституцияси, унинг яратилиш тарихи ва Бош қомусимиз шарофати билан юртимизда рўй бераётган улкан ўзгаришлар ҳақида йиғилганларга қизиқарли тарзда сўзлаб берди.
Таъкидландики, Конституция – давлатнинг Асосий қонуни бўлиб, у  давлат тузилишини, ҳокимият ва бошқарув органлари тизимини, уларнинг ваколати ҳамда шакллантирилиш тартиби, сайлов тизими, фуқароларнинг ҳуқуқ ва эркинликлари, жамият ва шахснинг ўзаро муносабатлари, шунингдек, суд тизимини ҳамда давлат ва жамиятнинг ўзаро муносабатларини белгилаб беради.
Конституциямиз Муқаддима, 6 бўлим, 26 боб, 128 моддадан иборат.
Ўзбекистон ўз мустақиллигини эълон қилган санадан эътиборан дунё саҳнида янги, суверен давлат қарор топган бўлса, биринчи Конституциямиз қабул қилинган куни давлатимиз янгидан туғилди, ҳақиқий мустақиллигимизга мустаҳкам ҳуқуқий пойдевор қўйилди.
Бош қомусимизнинг ғоя ва нормаларида халқимизнинг кўп асрлик тажриба ва маънавий қадриятлари, бой тарихий-ҳуқуқий мероси акс эттирилгани унинг ҳаётийлигининг кафолатидир.
“Ангрен кўмир кони” филиали ижрочи директори Александр Корчагин ва бошқалар тадбирда сўз олиб, жамият фаоллари ва ёшларни Конституция байрами билан қизғин қутладилар.
Истеъдодли хонанда Элдор Тўйчиев иштирокидаги байрам концерти барчага кўтаринки кайфият бағишлади.