J

Mamlakatimiz hududlariga kirib kelgan sovuq havo oqimi sabab aholini ikkilamchi yoqilg‘i bilan ta’minlash dolzarb vazifalardan biriga aylandi. Bu borada xonadonlarga ko‘mirni o‘z vaqtida yetkazib berish muhim ahamiyatga ega.

Namangan viloyat hokimi Shavkat Abdurazzoqov “Ko‘mir ta’minot” mas’uliyati cheklangan jamiyat viloyat filialining Davlatobod va To‘raqo‘rg‘on tumanlaridagi ko‘mir omborlarida bo‘lib, mavjud holatni ko‘zdan kechirdi.  

O‘zbekiston Respublikasi Vazirlar Mahkamasining 2024 yil 6 iyuldagi “Iqtisodiyot tarmoqlari, ijtimoiy va energetika sohasi ob’ektlari hamda ko‘p kvartirali uy-joy fondini 2024-2025 yillar kuz-qish davrida barqaror ishlashga tayyorlashni ta’minlash chora-tadbirlari to‘g‘risida”gi qarori asosida Namangan viloyatida aholi xonadonlariga “Ko‘mir ta’minot” mas’uliyati cheklangan jamiyat tomonidan jami 183,6 ming tonna ko‘mir yetkazib berilishi rejalashtirilgan.  

Bugungi kunda viloyat ko‘mir omborlari tomonidan mycoal.uz platformasi asosida mahalla fuqarolar yig‘inlari raislari orqali aholi xonadonlariga kunlik 1600-1750 tonnagacha ko‘mir yetkazib berish ishlari amalga oshirilmoqda. Hozirda iste’molchilarga ko‘mirning tonnasi 309 800 so‘mdan sotilmoqda. Davlatobod tumanidagi Rovuston ko‘mir saqlash va tarqatish omboridagi ish jarayonlarini o‘rganish chog‘ida viloyat hokimi tomonidan aholining qish mavsumida ko‘mir ta’minotiga bo‘lgan ehtiyojini qondirish yuzasidan ishlarni yanada tezlatish yuzasidan tegishli mutasaddilar zimmasiga topshiriqlar yuklatildi.  

Joriy kuz-qish mavsumida To‘raqo‘rg‘onda 17 ming 112 tonna ko‘mirga ehtiyoj borligi aniqlangan bo‘lib, hozirga qadar 13 ming 300 tonna yoqilg‘i aholi va ijtimoiy soha ob’ektlariga tarqatildi. Viloyat hokimining topshirig‘iga muvofiq 670 tonna ko‘mir keltiriladigan bo‘ldi.  

Oqilxon Dadaboyev, O‘zA

https://uza.uz/oz/posts/komir-taminoti-hokim-etiborida_666652