“O‘zbekko‘mir” aksiyadorlik jamiyati filiallarida korrupsiyaga qarshi kurashish samaradorligini oshirish, qonunchilikdagi o‘zgartishlarni xodimlarga tushuntirish va korrupsiyaviy xavf-xatarlarning oldini olishga qaratilgan seminar-yig‘ilishlar muntazam o‘tkazilmoqda.

Ana shunday tadbirlar jamiyatning “Transport” hamda “Tog‘-kon uskunalarini sozlash zavodi” filiallarida ham tashkil etildi.

Seminarlarda ishtirokchilarga O‘zbekiston Respublikasining 2026 yil 22 iyundagi O‘RQ–1155-son “O‘zbekiston Respublikasining ayrim qonun hujjatlariga korrupsiyaga qarshi kurashish samaradorligini oshirishga, korrupsiyaga oid jinoyatlar uchun javobgarlik muqarrarligini ta’minlashga qaratilgan qo‘shimcha va o‘zgartirishlar kiritish to‘g‘risida”gi Qonunining mazmun-mohiyati tushuntirildi.

Tadbirlar davomida korrupsiya va manfaatlar to‘qnashuvi bilan bog‘liq holatlarni aniqlash, korrupsiyaga qarshi kurashish sohasidagi qonunchilik talablariga rioya etish, huquqbuzarliklarning oldini olish hamda korrupsiyaga oid jinoyatlar uchun javobgarlikning muqarrarligini ta’minlash masalalariga alohida e’tibor qaratildi.

Shuningdek, komplaens va korrupsiyaga qarshi ichki nazorat tizimlarining ahamiyati, korrupsiyaviy xavf-xatarlarni baholash va bartaraf etish, korrupsiya holatlari haqida xabar berish mexanizmlari, xabar bergan shaxslarning huquqlari va xavfsizligini ta’minlash masalalari muhokama qilindi.

Seminarlar doirasida xodimlarning korrupsiyaga qarshi kurashishga oid qonunchilik hamda jamiyatning ichki me’yoriy hujjatlari bo‘yicha xabardorlik darajasi ham o‘rganildi.

“O‘zbekko‘mir” AJ tizimida qonunchilik talablariga qat’iy rioya etish, korrupsiyaviy xavf-xatarlarni barvaqt aniqlash va ularning oldini olish, xodimlar mas’uliyatini oshirish hamda halollik va ochiqlik tamoyillarini mustahkamlashga qaratilgan targ‘ibot-tushuntirish ishlari izchil davom ettirilmoqda.

“O‘zbekko‘mir” AJ Axborot xizmati