Bugun, 4-aprel kuni Toshkent davlat texnika universitetining “O‘zbekiston – Yaponiya” yoshlar innovatsiya markazida "Karyera kuni" mehnat yarmarkasi tashkil etildi.

Mazkur tadbirda “O‘zbekko‘mir” aksiyadorlik jamiyati ham ishtirok etib, universitet bitiruvchilarini o‘z faoliyati bilan yaqindan tanishtirdi. Jamiyat o‘zining maxsus ko‘rgazmasi va mavjud vakansiyalar haqidagi ma’lumotlar bilan ishtirok etdi.

Hozirgi kunda ishlab chiqarish korxonalari va oliy ta’lim muassasalari o‘rtasida uzviy hamkorlikni yo‘lga qo‘yish, ta’lim sifatini oshirish va raqobatbardosh kadrlar tayyorlash dolzarb masala hisoblanadi. Shu maqsadda tashkil etilgan mehnat yarmarkasi doirasida bitiruvchilar bilan suhbatlar o‘tkazilib, ularni ish bilan ta’minlash yuzasidan amaliy ishlar olib borildi.

Tadbir O‘zbekiston Respublikasi Prezidentining 2025-yil 14-fevralda qabul qilingan “Oliy ta’lim tashkilotlari bitiruvchilarining ishga joylashishiga ko‘maklashish bo‘yicha qo‘shimcha chora-tadbirlar to‘g‘risida”gi qarori ijrosini ta’minlash doirasida o‘tkazildi. Mehnat yarmarkasi yosh mutaxassislarni ish beruvchilar bilan bog‘lash, ularga yangi imkoniyatlar yaratish va mutaxassislik bo‘yicha ish topishlariga ko‘maklashishga qaratilgani bilan ahamiyatli bo‘ldi.