“O‘zbekko‘mir” aksiyadorlik jamiyatida yil boshidan buyon qazib olingan ko‘mir yoqilg‘isi hajmi 4 mln. 852,8 ming tonnadan oshdi. Bu rejadagidan salkam 417 194 tonnaga ko‘pdir.

Tezkor ma’lumotlarga ko‘ra, 3-oktabr holatiga joriy kuz-qish mavsumi uchun respublika aholi iste’molchilari uchun 342 950 tonna ko‘mir ortib yuborildi.

“Ko‘mir ta’minot” MCHJ tasarrufidagi respublika hududiy ko‘mir omborlari orqali aholiga tarqatilgan ko‘mir hajmi 297 703 tonnadan oshdi. Bu  mavsumiy rejaning 24 foizini tashkil etadi.

“Ko‘mir ta’minot” MCHJdan olingan tezkor ma’lumotlarga qaraganda,  Sirdaryo viloyati aholisi  8 593 tonna (39 %), Xorazm viloyati aholisi 45 310 tonna (38 %), Surxondaryo viloyati aholisi 16 522 tonna (30 %), Qoraqalpog‘iston Respublikasi aholisi 209 898 tonna (29%) mahalliy ko‘mir mahsuloti bilan ta’minlandi va hokazo.

Ayni kunlarda aholiga ko‘mir tarqatish uchun 102 ta hududiy ko‘mir ombori va shaxobchasi ishlab turibdi. 3-oktabr holatiga ushbu omborlarda 31 300 tonna zaxira mavjud.

Ma’lumot uchun, “Ko‘mir ta’minot” MCHJ tomonidan 2024/2025- yillar kuz-qish mavsumi uchun aholi iste’molchilariga 1 mln. 247 ming  119 tonna mahalliy ko‘mir sotish rejalashtirilgan.