3 dekabr – Xalqaro nogironlar kuni munosabati bilan “O‘zbekko‘mir” aksiyadorlik jamiyati tomonidan bir qator xayrli ishlar amalga oshirilmoqda.

Bugun Angren shahridagi 9-son ixtisoslashtirilgan yordamchi maktab-internatida madaniy tadbir o‘tkazilishida Jamiyat tomonidan amaliy ko‘mak ko‘rsatildi.

Tadbir Angren shahar hokimi Rayimov Alisher Abdumalikovichning tabrik nutqi bilan ochildi. U o‘z nutqida nogironligi bo‘lgan bolalarni qo‘llab-quvvatlash, ular uchun munosib sharoitlar yaratish va jamiyat hayotida faol ishtirokini ta’minlash dolzarb ahamiyatga ega ekanini ta’kidladi.

Tadbir davomida imkoniyati cheklangan bolalar tomonidan san’at va sahnaviy chiqishlar namoyish etildi. Bolajonlarning iste’dodi va chiqishlari ishtirokchilarda katta taassurot qoldirdi.

Mazkur madaniy dasturni yuqori saviyada tashkil etish maqsadida “O‘zbekko‘mir” AJ tomonidan didjey-ovoz operatori, ovoz kuchaytirgich jihozlari jalb etildi. Shuningdek, “Yoshlar” vokal guruhi ishtirokidagi qo‘shiqlar tadbirning ko‘tarinki ruhda o‘tishini ta’minladi.

Konsert dasturini tashkil etishda ham Jamiyat tomonidan har tomonlama yordam ko‘rsatildi.

Tadbir yakunida maktab-internatga 2 ta zamonaviy televizor sovg‘a qilindi. Bu esa bolalarning ta’lim va ma’naviy-ma’rifiy faoliyatini yanada boyitishga xizmat qiladi.

Tadbirda jamiyat Birlashgan kasaba uyushma qo‘mitasi raisi A.Qayumov ishtirok etdi va bolajonlarni tabriklab, sovg‘alarni tantanali ravishda topshirdi.

Nodira G‘anieva,

“O‘zbekko‘mir” AJ BIlashgan kasaba uyushma qo‘mitasi ishlar boshqaruvchisi