Joriy yilning 30-iyun ‒ 2 iyul kunlari “Axborot xizmatlari faoliyati: ochiqlik, tezkorlik va xolislik bosh mezon” mavzusida V milliy konferensiya bo‘lib o‘tdi.

Axborot va ommaviy kommunikatsiyalar agentligi tashabbusi bilan Toshkent viloyatining “Olmos” dam olish maskanida tashkil etilgan an’anaviy tadbirda vazirlik, idora va davlat organlari hamda tashkilotlari axborot xizmatlari rahbarlari qatori “O‘zbekko‘mir” aksiyadorlik jamiyatidan men ham ishtirok etib, katta taassurotlar bilan qaytdim.  

Konferensiyada yagona axborot siyosati yuritishda bugungi dolzarb vazifalar, axborot xavfsizligi, ochiqlik, tezkorlik va xolislikni ta’minlash yuzasidan dolzarb vazifalar haqida ma’ruzalar tinglandi, axborot xavfsizligi, feyklar, ichki kommunikatsiyalar, xalqaro media amaliyotlar, krizis PR, ivent-menejment va shaxsiy samaradorlik masalalarida yuzma-yuz fikr almashdi. Panel sessiyalar, amaliy mashg‘ulotlar va intellektual “Media-quiz” bellashuvlari yuqori saviyada tashkil etildi. “Omadli” jamoamiz bilim-ring bellashuvida 2-o‘rinni egallab, qimmatbaho sovg‘alar bilan taqdirlandi.

Axborot xizmati rahbarlari o‘rtasidagi bunday muloqot ‒ faqat bilim va ko‘nikmalarni oshirishgina emas, balki kasbiy jipslik, ochiqlik va o‘zaro tajriba almashinuvi madaniyatini mustahkamlashga xizmat qildi. Yangi g‘oyalar, mediasavodxonlik va tashkilot imijini mustahkamlashga doir yondashuvlar almashildi. Bu anjuman axborot xizmatlari uchun haqiqiy maktabga aylandi.

Ne’mat DUSHAEV,
“O‘zbekko‘mir” AJ Axborot xizmati rahbari