JamiyatTanlash

10-dekabr kuni OKAda o‘tkazilgan brifingda "O‘zbekko‘mir" AJ axborot xizmati rahbari Ne’mat Dushayev aholini va ijtimoiy soha ob’ektlarini ko‘mir bilan ta’minlash bo‘yicha amalga oshirilayotgan ishlar haqida ma’lumot berdi.

Unda ta’kidlanishicha, respublikamizda energiya resurslariga talab yildan-yilga ortib bormoqda. Ushbu talabni qondirishda elektr energiyasi va tabiiy gazdan tashqari, ko‘mirdan foydalanish ham muhim ahamiyatga ega. 

O‘zbekiston ko‘mir zahiralariga boy bo‘lib, asosiy yoqilg‘i manbalari Surxondaryo viloyatidagi Sharg‘un, Boysun hamda Toshkent viloyatidagi Angren ko‘mir havzalaridir. 

– “O‘zbekko‘mir” AJ joriy yilning o‘n bir oyida 6,3 million tonna ko‘mir qazib olib, yillik rejani muddatidan avval bajardi. Shu davrda qazib olish rejasi “Angren ko‘mir kon”da 111,3 foizga, shaxta usulida ko‘mir qazib olishda 112,1 foizga, “Apartak kon”da esa 114,2 foizga uddalandi. Yanvar-noyabr oylari davomida iste’molchilarga 5,3 million tonna ko‘mir yetkazib berildi. Shu jumladan, 3,4 million tonnasi issiqlik elektr stansiyalariga, 624,8 ming tonnasi byudjet tashkilotlariga, 1,06 million tonnasi esa aholi ehtiyojlari uchun yuborildi. Birja savdolari orqali 185,6 ming tonna ko‘mir sotildi, – dedi N.Dushayev.

Tadbirda aholi va byudjet tashkilotlariga mo‘ljallangan ko‘mir “Ko‘mir ta’minot” MCHJning 90 ta hududiy ombori va 13 ta shoxobchasi orqali tarqatilayotgani ta’kidlandi. Unga ko‘ra, 1 dekabrga qadar byudjet tashkilotlariga 376,9 ming tonna, tadbirkorlik sub’ektlariga 231,1 ming tonna, aholiga esa 906,2 ming tonna ko‘mir yetkazilgan. Shu jumladan, olis qishloqlarga 75,2 ming tonna mahalliy ko‘mir yuborilgan. 

E’tiborlisi, joriy mavsumdan aholiga ko‘mir yetkazib berish elektron platforma orqali amalga oshirilmoqda. Mahalliy hokimliklar tomonidan tasdiqlangan onlayn ro‘yxat asosida hududlardagi MFYlar orqali taqsimot yo‘lga qo‘yildi. 

N.Ziyodullayeva, O‘zA

https://uza.uz/uz/posts/joriy-mavsumdan-aholiga-komir-etkazib-berish-elektron-platforma-orqali-amalga-oshirilmoqda_665947