2026-yil 15-iyun kuni O‘zbekiston Respublikasi Prezidenti Shavkat Mirziyoyev muhim minerallar xomashyo bazasini kengaytirish va yuqori qo‘shilgan qiymatli mahsulotlar ishlab chiqarishni rivojlantirishga bag‘ishlangan taqdimot bilan tanishdi.

Taqdimotda 2026–2030-yillarga mo‘ljallangan dastur doirasida umumiy qiymati 4,2 milliard dollarlik 120 ta loyihani amalga oshirish rejalari ko‘rib chiqildi. Ularning ijrosi muhim minerallar sanoati hajmini oshirish, yuqori texnologik mahsulotlar ishlab chiqarishni kengaytirish hamda eksport salohiyatini mustahkamlashga xizmat qiladi.

Joriy yilda qiymati 166 million dollar bo‘lgan 12 ta loyihani ishga tushirish rejalashtirilgan. Natijada yangi metall turlari va import o‘rnini bosuvchi mahsulotlar ishlab chiqarish yo‘lga qo‘yilib, qo‘shimcha ish o‘rinlari yaratiladi.

Shuningdek, sohada geologiya-qidiruv ishlarini kengaytirish, raqamlashtirish va sun’iy intellekt texnologiyalarini joriy etish, ilmiy-tadqiqot va innovasion faoliyatni rivojlantirish bo‘yicha ustuvor vazifalar belgilab berildi.

Davlat rahbari muhim minerallar sohasi mamlakat iqtisodiyotining raqobatbardoshligini oshirish, eksport hajmini ko‘paytirish va yangi sanoat tarmoqlarini shakllantirishda muhim ahamiyat kasb etishini ta’kidladi.

Batafsil: https://president.uz/oz/lists/view/9304