“O‘zbekko‘mir” aksiyadorlik jamiyatida jamoaviy sport turlarini keng ommalashtirish, ishchi-xodimlar o‘rtasida jismoniy faollikni rag‘batlantirish va sog‘lom turmush tarzini shakllantirish bo‘yicha muhim tashabbus amalga oshirilmoqda.

Bu jarayon O‘zbekiston Respublikasi Prezidentining “Jamoaviy sport turlarini rivojlantirish va iqtidorli yoshlarni saralab olish tizimini takomillashtirish chora-tadbirlari to'g'risida” 2024-yil 4-dekabrdagi qarori ijrosi doirasida yo‘lga qo‘yildi.

Jamiyat Bosh direktori N.U. Dusmatov tomonidan tasdiqlangan joriy yil 26-iyundagi 232-sonli buyruqga muvofiq, ishchi va rahbar xodimlarning jismonan kamol topishi hamda jamoaviy sport turlari bilan muntazam shug‘ullanishi uchun barcha zarur shart-sharoitlar yaratiladi. Bunda ish vaqtidan keyin, haftasiga kamida bir marotaba sport mashg‘ulotlari o‘tkazilishi belgilandi.

Buyruq bilan:

• 1-ilovaga muvofiq, Jamiyat ishchi-xodimlari uchun sport mashg‘ulotlari jadvali tasdiqlandi;
• 2-ilovada Jamiyatning futbol va voleybol klublari mashg‘ulotlari rejasi belgilab berildi;
• 3-ilovada esa filiallarda smena asosida ishlovchi xodimlar uchun jismoniy faollikni tashkil etish tartibi ko‘rsatib o‘tildi.

Sport klublari raisi M. Abdullaevga mazkur mashg‘ulotlarni reja asosida tashkil etish, jamoa a’zolari o‘rtasida sog‘lom turmush tarzini keng targ‘ib qilish va har hafta amalga oshirilgan ishlar yuzasidan hisobot tayyorlash vazifasi yuklatildi.

Shu bilan birga, Ichki va tashqi xaridlar boshqarmasi (A. Egamberdiev) sport anjomlari, zal jihozlari va tozalik vositalari bilan ta’minlash ishlarini amalga oshiradi. Jamoadagi sog‘lom hayot tarzini ommalashtirish maqsadida matbuot kotibi N. Dushayev tomonidan Jamiyatning rasmiy veb-sayti hamda ijtimoiy tarmoqlarda muntazam axborot berilib boriladi.

Mazkur tashabbus nafaqat ishchi-xodimlarning sog‘ligini mustahkamlash, balki jamoada salbiy odatlardan yiroq, jips va samarali mehnat muhitini ta’minlashga xizmat qiladi.