O‘zbekiston Respublikasi mustaqilligining 35 yilligi munosabati bilan Prezidentimizning tegishli farmoniga muvofiq, bir guruh yurtdoshlarimiz qatorida “O‘zbekko‘mir” AJ “Transport” filiali kran mashinisti Namazov Azamat Isamatovich “Mehnat shuhrati” ordeni, shu filial buldozer mashinisti Imanov Baxodir Shakirovich esa “Shuhrat” medali bilan taqdirlangan edi.

Bugun “O‘zbekko‘mir” AJda ana shu yuksak davlat mukofotlarini o‘z egalariga topshirish marosimi bo‘lib o‘tdi.

Tantanali tadbirda “O‘zbekko‘mir” AJ Bosh direktori Nodirbek Dusmatov ishtirok etib, mukofotlarni o‘z egalariga topshirdi hamda ularni ushbu yuksak e’tirof bilan samimiy muborakbod etdi.

Taqdirlanganlar o‘z mehnatiga bildirilgan yuksak e’tibor va rag‘bat uchun minnatdorlik bildirib, kelgusida ham korxona taraqqiyoti va mamlakatimiz ravnaqi yo‘lida sidqidildan mehnat qilishlarini ta’kidladi.