Ijtimoiy tarmoqlarda aholi ehtiyojlari uchun yetkazib berilayotgan mahalliy ko‘mirning sifat ko‘rsatkichlari yuzasidan turli noto‘g‘ri talqinlar tarqalmoqda. Xususan, ko‘mir mahsulotining kulchanlik darajasi uning mayda-yirik fraksiyasi bilan adashtirilayotgan hollar kuzatilmoqda. Ma’lumot uchun qayd etish joizki, kulchanlik mahsulot yonganidan so‘ng qoladigan mineral qoldiqlar miqdoridir va u ko‘mirning yirik yoki mayda ekanligiga bog‘liq emas.

Ana shunday tushunmovchilik natijasida ijtimoiy tarmoqda Bog‘ot tumanida istiqomat qiluvchi fuqaro D. Rahimov tomonidan aholiga go‘yo kulchanlik darajasi 50–70 foiz bo‘lgan ko‘mir tarqatilayotgani haqida murojaat e’lon qilindi (https://t.me/komporuz/28267). Ushbu murojaat uning muallifi ishtirokida “Ko‘mir ta’minot” MCHJ Xorazm viloyati filiali mas’ullari tomonidan atroflicha o‘rganib chiqildi.

O‘rganish davomida murojaatga ilova qilingan fotosuratning eski ekanligi aniqlandi. Murojaatchi bilan ochiq muloqot o‘tkazilib, mahalliy ko‘mirning amaliy sifat ko‘rsatkichlari bo‘yicha tushuntirish berildi. Shuningdek, fuqaroga o‘rnatilgan tartib asosida amaliy yordam ko‘rsatilib, belgilangan miqdordagi mahalliy ko‘mir bilan ta’minlandi.

“Ko‘mir ta’minot” MCHJ Xorazm viloyati filiali rahbari K. Jumaniyozov ta’kidlashicha, aholiga yetkazib berilayotgan mahalliy ko‘mir sifatini kafolatlash maqsadida barcha zarur texnik va tashkiliy chora-tadbirlar doimiy ravishda amalga oshirib borilmoqda.

Ma’lumot uchun, aholiga tarqatilayotgan mahalliy ko‘mir 2BZR markasiga mansub bo‘lib, fraksiyasi 0–700 mm, kulchanlik darajasi 17 foiz, namlikligi 40 foiz,      yonish    kaloriyasi 3200   kkal/kg   va   mineral   aralashmalar    miqdori 3 foizni tashkil etadi. Ushbu sifat ko‘rsatkichlari amaldagi texnik reglamentlar va laboratoriya nazorati asosida muntazam tekshirib boriladi.

“O‘zbekko‘mir” AJ Axborot xizmati