Joriy yilning 8 aprel kuni “O‘zbekko‘mir” aksiyadorlik jamiyatida Rossiyaning Toshkent shahridagi “Haul Truck CA” mas’uliyati cheklangan jamiyati vakillari bilan uchrashuv tashkil etildi.

Uchrashuvda “O‘zbekko‘mir” AJ bosh muhandisi V.V. Kuznetsov hamda jamiyatning yetakchi mutaxassislari ishtirok etdi.

Muzokaralar davomida ikki tomonlama texnik hamkorlikni qayta tiklash, ehtiyot qismlar va sarf materiallarni yetkazib berishdagi uzilishlarni bartaraf etish, ombor zahiralaridan samarali foydalangan holda ta’minot tizimini takomillashtirish, shuningdek, xizmat ko‘rsatish sifatini oshirish kabi qator dolzarb masalalar muhokama qilindi.

Tomonlar o‘zaro hamkorlikning hozirgi holati, texnik xizmat ko‘rsatishdagi mavjud muammolar, ehtiyot qismlar ta’minoti, ombor infratuzilmasi hamda dvigatel modifikatsiyasi sohalaridagi imkoniyatlar yuzasidan fikr almashdilar.

Asosiy e’tibor so‘nggi yillardagi ta’minot uzilishlari, texnik xizmat ko‘rsatishdagi kechikishlar hamda avval kelishilgan, biroq amalga oshirilmagan majburiyatlarning sabablarini aniqlash va ularni bartaraf etish chora-tadbirlarini belgilashga qaratildi.

Uchrashuv yakunlari bo‘yicha tomonlar o‘zaro hamkorlikni mustahkamlash va mavjud muammolarni hal etish yuzasidan kelishuvga erishdilar.